2012年7月29日星期日
今日終於到出發既日子, 貓籠中既長毛同當奴都好唔開心, 而且仲好似好驚咁, 不過呢次只係2日1夜, 佢地好快又會見到我地架喇 !!
當minos起得身, 已經係早上六點半, 而我地上車時間係七點半, 仲有時間去麥當當食個早餐, 再慢慢行去等旅遊巴.....不過等到七點十個字先有車黎, 上到車影吓先 !!
我地過關後第一個景點, 就係去夢幻百花洲, 不過因為早前颱風影響, 百花洲入面好多花都被摧毀, 加上又唔係花期, 所以真係無咩好睇....
入場前有隻牛, minos大膽都想走埋去摸佢, 嚇到隻牛向後走......
百花洲入口, 當時仲未知入面係如此.......景況......
入場後, 由場地既導遊帶我地快快咁行, 為咗同minos影靚相, 我地做咗包尾大王.....
要我地行咁快, 原來就係為咗去睇表演, 先黎一段音樂跳哂碟, 類似70年代艷舞, minos真係好欣賞咁架......
之後係真正精彩既雜技, 當我地拍爛手掌後, 再黎音樂播到甩哂既阿拉伯式肚皮舞, 當我諗住有魔術睇時, 主持人走出黎, 大唱新鴛鴦蝴蝶夢, 不過音樂開得太大聲, 令我地受唔住, 決定離開唔睇, 留番啲時間去再影相......
係呢度逗留約一個鐘半, 就去食中午, 係正景點隔離, 初時導遊同領隊都一齊話呢一餐係風味餐, 即係未必人人覺得好食, 點知我同minos爸爸都食咗兩大碗飯, minos都食咗一碗仲有好多餸添架......
之後就再上車, 去今次旅行我地既主要目的地 -- 香市動物園 !!
點知導遊話因為順路既關係, 要將明日一個行程放埋今日, 咁即係我地行呢個動物園既時間被縮短, 只有一個半鐘行, 仲要話睇唔到馬戲, 其實我真係唔多開心架.....不過minos開心就得喇 !! 而minos最關心既係, 餵唔餵到長頸鹿呀.......
因為時間太有限, 我地先作主動出擊, 即係先行去搵長頸鹿, 好彩我迫到埋去買樹枝餵, 咁先不負minos所望呀 !!
我地唔止餵長頸鹿, minos仲可以摸到呀 !! 見唔見隻手仔呀 !!
抱住minos餵完長頸鹿, 我已經濕透, 不過仲未可以停, 我地要爭取時間, 帶minos睇一啲係香港見唔到既動物呀 !!
行到途中, 俾我地見到有得俾十蚊人民幣, 可以騎駱駝自己影相, 我就再黎排除萬難, 俾minos上駱駝喇 !! 放心, 上之前我千叮萬囑minos唔可以郁, 要定定地坐, minos呢一刻真係好聽話呀 !! 只係隻駱駝俾其他人既闖入而嚇到退後一, 兩步, 不過minos都仲坐得好穩陣喎....
minos除咗鐘意長頸鹿之外, 就係鐘意大象架喇......
時間關係, 我地臨集合前, 快快去睇埋獅子先......不過獅子們就因為太熱, 唔多起身行.....
我地睇最後既一種動物, 就係河馬, 原來真係好大隻架.....
個心仲好想睇好想餵長頸鹿既minos, 唔願走既樣.......
不過好在之前買定隻長頸鹿公仔, 仲可以氹到佢乖乖行上旅遊巴, 同動物園講再見.....
跟住就去咗唔係今日行程, 但係就霸佔咗今日時間既糕點博物館......
呢度都花咗成個半鐘黎行, 行完都買咗兩盒餅食, 之後就上番車, 去五星級既三正半山酒店 !! 係大堂等分房時.....
上到房間後...
再落去食自助晚餐,早早地, 趁人少少既時候, 開始食自助餐.......
食個差不多兩個鐘, 大家都食飽飽, 再坐多半個鐘休息, 跟住就係我同minos爸爸relax既時間, 就係去足沐.....估唔到, 酒店既足沐都只係$58按70分鐘, 仲要連埋按背添......
呢個時候既minos就係睇電視同玩nds打發時間, 我同minos爸爸今日都行到夠, 因為我今日仲行到腳底抽筋, 所以我地唔買泳衣去游水, 反而去按腳....
按完真係2個人, $116人民幣埋單, 咩雜費代支都唔駛, 真係估唔到咁開心呀 !! 跟住就上房, 沖涼後俾minos早少少上床瞓覺, 因為佢今日玩到無瞓晏覺架.....
2012年7月30日星期一
minos瞓到扯哂鼻鼾, 而我就因為驚minos會半夜反瞓跌落地, 而成晚瞓得唔冧, 今朝六點就醒咗, 不過好在我地八點先要起身, 我可以賴吓床....
我典到七點就起身收拾細軟, 完成差不多八點, 就等佢地兩父子起身, 仲要氹minos自己去刷牙, 然後再樓去食自助早餐....
食完早餐, 就行出酒店門外, 去影一個好大好大既荷花池, 因為導遊話過, 入黑後唔好離開酒店, 因為東莞既治安真係唔好, 所以我地要留番今朝先去到影相......
minos影完相再行去欣賞荷花.....
之後番酒店坐吓, 到十點十五分就落大堂check out.....之後坐咗一個鐘頭車, 十一點半就去到袁祟煥紀念公園....不過只得半個鐘去行, 真係好唔足夠呀 !!
之後就再去食中午自助餐, 突然覺得呢個唔係純玩團, 應該係純食團先啱......
食到我地一家三口飽飽後, 又未夠鐘上車, 就係街頭影吓相.....
因為今日只有一個景點, 所以食完兩點半就開車返去皇崗同羅湖, 我地過關時都只係四點多咋 !! 其實呢個團大致都可以, 只係我唔多欣賞佢地分行介紹既資料, 同實際情況有咁大出入, 因為我報團時, 佢地仲話有馬戲, 又話會有3個鐘係動物園, 點知去到只得1個鐘頭15分鐘, 又無得睇馬戲 (因為入場時一點多, 兩點半集合, 而馬戲時間係十二點半同兩點半, 根本無可能睇到), 反而用咗啲時間去另一日既景點, 第二日行既紀念公園又只得半個鐘, 個公園唔細架, 令我覺得佢地好似想趕收工咁......唉.......我決定明日要打去旅行社反映吓先得 !!
沒有留言:
張貼留言